A Giambellin
testo di Marco Candiani, musica di Claudio Merli
L’era quasi nott, gh’era on nebbion e seri la
in fond prima di praa
Seri a Giambellin come a cercà i mè vint ann
in strada o in d’ona piola
La dedree i vedrinn on poo panaa gh’era on bigliard
duu dadi e on mazz de cart.
Ma di mè amis gh’era pu, nanca pu l’ombra de chi
giugava a scopa con mi.
Al mes de magg se spettava
foeura de gesa i tosann
che te izigaven magara on ciccin
ma poeu coreven a cà.
Ma che fin hann faa tucc i amis di mè vint ann
sui strad de Giambellin.
Se tirava nott e stavom li a cicciarà
de sport sul marciapee
o de bei tosann che a Giambellin, foo no per di,
ghe n’era forsi on mila.
Stavom li a inventà stori de donn mai conossuu,
insci per fa i depù
Ma che fin hann faa i discussion, Bartali e Coppi hinn andaa
a cor on gir in di stell
Inscì passava la vita
dent in la piola coi cart
o in la strada coi dadi de nott
sotta la lus d’on lampion.
‘Dess conossi pu el Giambellin e resti chi
senza on amis per mi.