testo di Marco Candiani, musica di Claudio Merli

Mi stasera senti de vess on poo giò

e torni indree in del temp che ormai gh’è pù.

Senti tanta rabbia quand mi pensi a ti

perché me ven in ment quell che t’hee faa.

Te see stada ona carògna l’è per quell che mi te canti

i paroll de la mia rabbia che te voeuri fa scoltà.

Mi piangevi e te vedevi quasi a rid, come sfacciada

sora i lacrim che gh’avevi in di oeucc denanz a ti.

Maledissi anca quell dì che t’hoo vist la prima volta

cont in man gemò la gotta del velen che me spettava.

Con la rabbia che gh’hoo dent mi te spongiaria el coeur

e quell fa de carognetta brusaria in d’on falò.

‘Dess son chi in la strada quella che te see

ma chi vesin a mi ti te gh’hee see pù,

gh’hoo domà paura per on tram che’l và

là in fond in tra la nebbia, con ti.

L’è impostora la cantada coi paroll de tanta rabbia,

me pentissi, gh’hoo vergogna quell che hoo dii el pensavi no.

L’è impostora la mia rabbia, l’è on lament, ona ferida,

ona spina, ona spongiuda che oramai gh’hoo denter chi.

Orchestra

Hoo cantaa fòrsi per nient, hoo cantaa domà ricord

Ciami scusa a chi me scolta e te ciami scusa a ti.

Andaroo per la mia strada, coi penser, ma senza rabbia,

tegni dent quella ferida, ma te voeuri ben anmò.